قل قبل كم عام شبع بعض آباء وأجداد من حكم أهوش، والبعض جالس مطبل على فقره وجهله، عادي ما فرقتش معه حتى لو يأكل أظافره من الجوع، المهم يحرس الإمام ويمشي وراه مثل الغنمة، وإن الإمام بيأكل من وراء ظهورهم تفاح ورمان.. المهم قال العُقَّال نشتي دولة سوا من حق الناس ونأكل ونشرب ونترزق الله من خير بلادنا واحنا ما بنطلبش كثير. وتحاكوا وجاؤا له من هانا ومن هاناك؛ لكن بعض الناس ملانه بطرة وبوقة ونافش ريشه على الفاضي ما ينفع معاه مراشاة، ما ينفع معاه إلا صميل مربط، وفي جاه الله تصايحوا وبدأت معارك، وكل واحد استنجد بمن يغور عليه ويساعده.. المهم بلطف الله انتصر الشعب، وجاءت الجمهورية وأزاحت الملكية الشيعية.. وسمّوها ثورة، وكل من كان مؤيد لجاية الجمهورية صفق وغرد لها وفرح بها واستبشر وهلل، ومن ضاك الزمان للآن بيحيوا هذه الذكرى وتوارثناها جيلا بعد جيل.. ومن ضاك الزمان والملكية منكسة رأسها ويا لطيف الطف والغيرة، لو عليها لتمزق الجمهورية تمزيقا وتشنترها شنترة وتذرها ذرور في كل دخسة وفي كل وادي.. هذي ثورة سبتمبر المجيدة الخالدة، اللي حدثت في 26/9/1962، أطاح الشعب الحر بحكم إمامية شيعية تتحكم فيه أسرة، وتأسست دولة جمهورية.. يعني مفهوم جمهورية عكس ملكية، والملكية عندنا في اليمن عدوتها اللدودة الحر جمهورية.. خلاص؟ ماشين مع بعض سوا؟ طيب، جلست الملكية الغيورة من ضاك العهد وهي بتنفخ نفسها وتدور لها من يأكلها ومن يسمنها من هانا ومن هاناك وتضحك قليل مع الجمهورية والجمهورية مسكينة على نياتها ظنت إنها بتضحك لها من حب وإن قدهن خباير وصاحبات وخرجت معاها يوم 11/2/2011، على أساس إن طريقهن واحد، وهذك الملكية من تحت لتحت بتتلوى وتنفث سمها وربّت عيالها على الكراهية وجيل بعد جيل لما اليوم المشؤوم، يوم 21/9/ بعدما كبرت، قلبت وقد بان الخبر حقها، بدأت بخبيرتها قبل عدوتها اللي مرغت وجهها في التراب حرب بعد حرب ودعس بعد دعس.. المهم ما علينا.. اللي يهمني الآن، إن أحداث 21/9 هي محاولة لإرجاع السيدة ملكية بنت السيد الشيعي الحوثي، هتك الله ستره.. لا هانا ماشين سوا؟ طيب، أعيد بأسلوب ثاني مختصر لأجل اللي ما فهم الأول يفهم ذلحين.. ولو إني أشك إنه عاد يفهم أصلا، لكن الأمانة لازم توصل لأصحابها. يعني أحداث انقلاب 21/9 هو محاولة لإحياء الملكية وقتل الجمهورية اللي قامت بعدما قتلت الملكية في 26/سبتمبر.. يعني ذكرى 26/سبتمبر هي حقنا احنا اللي صفقنا للجمهورية. فليش اللي بيحاولوا يحيوا ملكية بنت السيد خرجوا يحتفلوا معانا؟! لا ومش هكذا بس وبينتقدونا كيف بنحتفل بثورتنا واحنا واقفين ضدهم.. مش أنا دارية هو أنا عندي لخبطة في الموضوع وقلة فهم، أو هم عندهم ازدواجية في التفكير وعقلية مربوشة؟! خلونا نعرف من المختل فينا احنا أو هم. الكبار حقهم في صفحاتهم بيولولوا ويبكوا على عهد الإمام وإن ثورتنا - لما أقل ثورتنا يعني أقصد ثورتنا 26/سبتمبر سبب تفكك اليمن وخرابه... وووو.. وهلم جر، وإن الانقلاب هو ضياء صنعاء واليمن.. ويجوا لي المتحيوثون الصغار يغردوا لثورتنا وهم قبل أربع أيام منها طبلوا لانقلابهم.. طيب من المختل ما ذلحين؟! لحظة، لحظة عاد باقي سر مدري وهو السيد والسادة الكرام حاكوكم عليه أو لا، العلم الحالي لليمن، هو نسخة معدلة من العلم اللي ارتفع أول مرة لما جاءت الحرة جمهورية جاءت هي وهو سوا سوا، يعني متشابكة أياديهم، يعني هي جابته معاها، ولأجل تذكر أبناءها البررة بما حصل لآبائهم وأجدادهم حطت لون أسود في العلم، لأجل لا ينسوا فعلة الملكية الشيعية في ضاك الزمن.. والنشيد الوطني والكل هو حق ثورتنا احنا احنا.. ويجوا لي حوثيون يرددوا النشيد ويرفعوا العلم اللي ارتفع على رفات مملكتهم قد وقد حببوه لما قالوا بس.. قدكم على صرختكم أخرج لكم.. هيا وكيف ذا الخبر معك يا حوثي؟! يا تحيوثت سوا وفهمت خطط مؤامرتكم، يا خلوكم معانا نخطيكم دلا دلا، وخطوة خطوة. وخلوا في بالكم إن ما يدلعكم السيد مثلما نفعل لكم احنا.. هو مش فاضي لكم كوده يحشدكم تأكلوا معاه من تفاح الجنة!! وسلامتكم ألف سلامة( ألف سلامة خيرة، وحدّ الحلى، لأنها لو زادت على ألف تنقلب ضدكم وضدنا) - ، ولا جاكم - لو فتحتوا عقولكم - شر.